हवाई दलाच्या जवानाचे वेष धारण करून फसवणूक करणाऱ्यास पुण्यात अटक
लोक समाचार– राज राठोड
पुणे :शहर हवाई दलाच्या जवानाच्या वेशात फसवणूक करणाऱ्या एका व्यक्तीला दक्षिणी कमांड मिलिटरी इंटेलिजन्स आणि पुणे पोलिसांच्या संयुक्त कारवाईत अटक करण्यात आली आहे. अशी माहिती रविवारी पुणे पोलिसांकडून मिळाली आहे,
पोलिसांनी दिलेल्या माहितीनुसार, आरोपी गौरव कुमार (वडिलांचे नाव – दिनेश कुमार) याच्याबाबत संशयास्पद हालचालींची गुप्त माहिती मिळाल्यानंतर त्याचे निरीक्षण करण्यात आले. त्यानंतर १८ मे रोजी रात्री ८:४० वाजता पुण्यातील खराडी परिसरातून त्याला ताब्यात घेण्यात आले. 
तपासादरम्यान आरोपीकडून फसवणुकीसाठी वापरण्यात आलेले साहित्य जप्त करण्यात आले आहे. यात दोन हवाई दलाचे टी-शर्ट, एक कॉम्बॅट पँट, एक जोडी कॉम्बॅट शूज, दोन बॅजेस आणि एक ट्रॅकसूट अप्पर यांचा समावेश आहे.
या प्रकरणी आरोपीविरुद्ध भारतीय दंड संहिता (BNS) च्या कलम १६८ अंतर्गत खराडी पोलीस ठाण्यात गुन्हा दाखल करण्यात आला आहे. सध्या आरोपीची चौकशी सुरू असून त्याच्या वर्तनामागील उद्देश आणि सुरक्षेशी संबंधित संभाव्य धोके याची तपासणी केली जात आहे. लवकरच अधिक माहिती समोर येण्याची शक्यता आहे.
